مكرونه نجرسكو
المقادير الاساسيه لصينيه صغيره تكفي اربع اشخاص ولو عايزه كبيره ضاعفي الكميه :
-ربع كيلو صدور فراخ فيليه مقطع شرايح زى الشاورمه
-كيس مكرونه قلم400 جرام او في ناس بتعملها شرايط بس انا بحبها قلم
- صوص بشاميل
مقادير الفراخ :
-شرايح فراخ مقطعه شاورمه
-فلفل الوان شرايح ولو مفيش الوان فلفل رومي اخضر عادي
-بصله مقطعه شرايح
- زتون اخضر شرايح (اختياري)
-جزره مبشوره صغيره (اختياري)
- ملح - فلفل اسود - بهارات فراخ
-معلقه كبيره زبده وعليها معلقه زيت
الطريقه :
1-في طاسه عالنار نحط الزبده والزيت ولماتسخن ننزل بشرايح الفراخ لحد ماتاخد اللون الابيض
2- ننزل بشرايح البصل ونحط الملح والفلفل والبهارات
3- ننزل بالجزر المبشور والفلفل الالوان ولما تستوي ننزل بشرايح الزتون ونقلب ونطفي عليها كده خلاص بقت جاهزه
مقادير البشاميل :
- 3 كوبايات لبن
- 3 معالق كبيره دقيق
- 3 معالق كبيره زبده
-معلقه صغيره اوي توم بودر وبصل بودر ورشه بسيطه جوزه الطيب ملح وفلفل اسود ومكعب مرقه دجاج
الطريقه :
ننزل بالزبده ولما تسيح ننزل بالدقيق ونقلب كويس ولما تاخد لون بسيط دهبى ننزل باللبن حبه حبه واحنا بنقلب واللبن ميكونش سخن عشان ميكبكعش ولو عندك ويسك قلبي بيه كويس وبعدين ننزل بالبهارات اللي قولت عليها ومرقه الدجاج اختياري لحد مايوصل للسمك اللى انتي عاوزاه نطفي عليه كده بقى جاهز
طريقه سلق المكرونه :
مايه في حله عالنار وفيها معلقه صغيره ملح ومعلقه كبيره زيت ولما تغلي انزلي بالمكرونه سبيها 7 دقايق بالظبط وشيليها في مصفه
تجهيز النجرسكو :
افتحي الفرن علي 180درجه او متوسط الحراره وسبيه يسخن
1-هتجيبي طاجن او صينيه اى حاجه عندك تحطي معلقه بشاميل في القعر وتفرديها مهم جدا عشان متلزقش
2- تجيبي المكرونه وتحطي عليها 3 او 4 معالق كبار بشاميل وتقلبي الخطوه دي بتخلي طعمها تحفه وتحطي نص المكرونه
3-تحطي الفراخ كلها
4-تحطي نص المكرونه التاني
5-ننزل بالبشاميل على الوش
6- نرش جبنه رومي وجبنه موتزاريلا علي وش البشاميل الخطوه دي هتدي لون جميل للبشاميل وطعم تحفففه
7-دخليها الفرن لمده 45 دقيقه او لحد ما وشها يحمر
طلعيها من الفرن وسيبيها تبرد مش اقل من ساعه عشان تعرفي تقطعيها وبالهنا والشفا
جربوها وقولولي رايكو هتدعولي :)
تعليقات
إرسال تعليق